Баланопостит
Баланопостит — жыныс мүшесінің басы мен күпектің жедел немесе созылмалы қабыну ауруы. Баланопостит кезінде жыныс мүшесінің басы мен күпекте ауырсыну, қышу, ашыту, қабыну және ісіну пайда болады. Уретрит немесе парафимоз түріндегі асқынулар болуы мүмкін.
Баланопоститтің негізгі себептері — зеңдік инфекциялар, вирустар және бактериялар. Өте сирек жағдайларда ауру аллергиялық реакциялар мен токсиндердің әсерінен туындауы мүмкін.
Баланопоститтің белгілері
ауырсыну сезімі,
ойық жаралар мен ұсақ жаралардың пайда болуы,
іріңді бөлінділер,
қышу және ашыту,
гиперемия,
жарықтар,
несеп шығарудың қиындауы.
Баланопоститтің түрлері
- Жедел баланопостит:
қарапайым баланопостит (катаральды баланопостит) — жеңіл тітіркену, қатты мазаламайтын қышу;
эрозиялық баланопостит — шекарасы анық, ақ түсті үлпек-қабыршақты түзілістері бар аймақтардың пайда болуы, кейін олардың орнында қатты ауырсынатын ірі эрозиялық аймақтардың қалыптасуы;
гангреналық баланопостит — гиперемияланған аймақтардың және интоксикация белгілерінің пайда болуы; құрамында іріңі бар айқын ойық жаралардың түзілуі (күпектің тесілуі мен некрозына дейін); қан кету; асқынған гангреналық баланопостит кезінде — жыныс мүшесінің гангренасы;
іріңді-ойық жаралы баланопостит — трофикалық ойық жараларға айналуға бейім көптеген іріңді түзілістердің пайда болуы.
- Созылмалы баланопоститке ойық жаралы-гипертрофиялық түрдің белгілері тән.
- Индуративті баланопостит (сирек кездесетін түрі) — дистрофиялық өзгерістер және тіндердің бүрісуі.