Бартолинит

Бартолинит — бартолин безінің жедел іріңді қабынуы. Бартолин бездері, басқаша айтқанда қынап кіреберісінің үлкен бездері, үлкен жыныс ернеулерінің кіреберісінде орналасады. Бартолин бездері бөлетін секрет қынаптың қалыпты ылғалдылығын қамтамасыз етеді.

Себептері

Бартолиниттің пайда болуына ықпал ететін факторлар:

жеке гигиена ережелерін сақтамау,

несеп-жыныс жолдарының инфекциялық ауруларының болуы.

Инфекция бартолин бездерінің шығару өзектеріне қынаптан немесе несеп шығару өзегінен түседі.

Симптомдары

Бартолиниттің негізгі белгілері: ауырсыну, қызару, іріңді инфекция ошағының болуы — үлкен жыныс ернеулерінің қалың қабатында ірі, тығыз инфильтрат анықталады, оны басқан кезде қатты ауырсыну пайда болады.

Сонымен қатар жалпы интоксикация белгілері байқалады: дене температурасының жоғарылауы, әлсіздік, бас ауруы. Іріңдік өздігінен жарылып, одан көп мөлшерде қою ірің бөлінуі мүмкін. Абсцесс өздігінен ашылғаннан кейін пациенттің жағдайы қалыпқа келіп, дене температурасы төмендейді және ауырсыну синдромы айтарлықтай азаяды.

Алайда жағдайдың мұндай айқын жақсаруы сауығудың белгісі болып табылмайды. Тиісті ем жүргізілмеген жағдайда жедел қабыну созылмалы түрге ауысуы мүмкін, оны емдеу әлдеқайда күрделі және болжамы да қолайсыз болуы ықтимал.

Диагностикасы

Бартолинитті диагностикалау қиын емес және пациентті гинекологиялық тексеруге негізделеді. Сирек жағдайларда УДЗ жүргізу қажет болуы мүмкін.

Емі

Емдеу хирургиялық жолмен жүргізіледі — стационар жағдайында іріңдікті ашу арқылы.