Бес мың бала
Тәжірибелі репродуктолог дәрігер Алмаз Ибрагимов Қазақстан Президенті Нұрсұлтан Назарбаевтың алдында сөз сөйлеп, бір отбасының бақытқа қол жеткізу тарихын айтып берді, деп хабарлайды «ҚазАқпарат» ХАА тілшісі.
«Студент кезімде Қарағанды медицина академиясында оқып жүріп, жақсы хирург болуды армандадым. Бірақ соңғы курстарда бір жас отбасымен бірге пәтер жалдап тұрдым. Олар өте жақсы, әдемі, жас отбасы еді, бірақ бір мәселе болды. Ол кезде олардың бірге тұрғанына үш жыл болғанымен, балалары жоқ еді. Мен олармен екі жыл бірге тұрдым және олардың қалай тексеруден өтіп, дәрігерлерге барып, емделгенін, бірақ нәтиже болмағанын көрдім. Сол кезде оларға көмектескім келді», — деді Алмаз Ибрагимов Мемлекет басшысының «100 жаңа есім» жобасының жеңімпаздарымен салтанатты кездесуінде.
Дәрігер дәл сол кезде бедеулік мәселелерін зерттей бастағанын және кейіннен өзінің мамандану бағытын өзгерткенін айтты. Алмаз Ибрагимов «Болашақ» бағдарламасы бойынша Сеченов атындағы Мәскеу медицина академиясының клиникалық ординатурасына түсіп, өзінің айтуынша, баға жетпес білім мен тәжірибе алды.
«Бұл маған өмірде өз орнымды табуға шынымен көмектесті. Елге оралғаннан кейін бедеулікті емдеу және экстракорпоралдық ұрықтандыру бойынша алғашқы мамандандырылған «Экомед» клиникасына жұмысқа орналастым. Кейін Еуропаның жетекші елдері мен АҚШ-та бірнеше рет білімімді жетілдірдім. Әйелдер мен ерлер бедеулігін емдеу әдістерін меңгердім. Репродуктолог дәрігер болдым. Бүгінде менің және «Астана Экомед» командамның еңбегінің нәтижесінде бес мыңнан астам бала дүниеге келді. Қазір күн сайын 1–2 сәби дүниеге келеді», — деді ол.
Дәрігер еліміздің тоғыз филиалында жұмыс істейтін бүкіл «Экомед» компаниясы ұжымының еңбегінің арқасында 12 мыңнан астам бала дүниеге келгенін атап өтті.
«Айтпақшы, Нұрсұлтан Әбішұлы, сол жас отбасының тарихын аяқтап айтқым келеді. Арада жылдар өткен соң мен оларды бәрібір тауып алдым, ол кезде олардың жасы 40-қа таяп қалған еді. Оларға көмектесе аламын ба деген үлкен күмән болды. Сол сәтте олар өз жағдайларымен әлдеқашан келісіп қойғандай көрінді. Бірақ тәуекел еттім және қолымнан келді. Қазір олардың жеті жастағы тамаша қызы өсіп келеді. Бұл мені қатты қуантады», — деді ол.
Алмаз Ибрагимов бүгінде көптеген отбасы үшін балалы болу әлі де орындалмас арман, тіпті ғажайып секілді болып отырғанын атап өтті.
«Осындай мәселеге тап болған отбасыларға қолдарын түсірмей, үміттерін үзбей, өз армандарына жетуге ұмтылуды тілеймін. Өйткені бүгінде еліміздегі медицинаның дамуы бедеуліктің кез келген түрін жеңуге көмектесе алады», — деп қорытындылады ол.
Дереккөз: https://www.inform.kz/ru/pyat-tysyach-detey-vopreki-vrach-rasskazal-prezidentu-kak-spasaet-besplodnye-sem-i_a3497991
