«Жіңішке» эндометрия
«Жұқа» эндометрий — жиі кездесетін жағдайлардың бірі. Бұл кезде жатырдың шырышты қабатының қалыңдығы жеткіліксіз болып, эмбрионның имплантациялану процесі бұзылады және соның салдарынан ЭКҰ бағдарламаларының нәтижелілігі төмендейді.
Эндометрий немесе жатыр қуысын астарлап тұратын ішкі қабат әйелдің репродуктивтік функциясында маңызды рөл атқарады. Эндометрий екі қабаттан тұрады: төменгі — базальды және жоғарғы — функционалдық. Базальды қабат гормоналдық фонның өзгеруіне байланысты өзгермесе, функционалдық қабат гормоналдық жағдайға тікелей тәуелді және эмбрионның имплантациялануы мен одан әрі дамуына жауап береді.
Эмбрионды тасымалдау кезінде эндометрий қалыңдығы 7 мм-ден аз болса, бүкіл ЭКҰ бағдарламасының тиімділігі айтарлықтай төмендейді.
Эндометрий қалыңдығының азаю себептері
Қабыну процестері: жедел және созылмалы эндометрит (хламидиялық инфекция, гонорея, туберкулез, эндометрийдің вирустық зақымдануы);
Гормоналдық және эндокриндік бұзылыстар (әйел жыныстық гормондарының тапшылығы);
Эндометриоз;
Жатырішілік жарақаттаушы араласулар (түсік жасату, жатыр қуысын қыру);
Туа біткен себептер — эндометрийдің гормондарға сезімтал рецепторларының ақауы.
Симптомдары
Аз мөлшердегі, жағынды тәрізді етеккір бөлінділері;
Етеккірдің қысқа мерзімді болуы;
Етеккір циклінің тұрақсыздығы;
Бедеулік.
Диагностикасы
Бұл жағдайды диагностикалау циклдің 3-ші, 7-ші, 10-шы, 12-ші және 14-ші күндерінде УДЗ-мониторинг жүргізу арқылы жүзеге асырылады. Сондай-ақ барлық пациенттерге емдеуге дейін және одан кейін эндометрий биопсиясымен диагностикалық гистероскопия жүргізу көрсетілген.
Емі
«Жұқа» эндометрий жағдайын түзету — айтарлықтай күрделі әрі ұзақ процесс. Бірнеше ай бойы эндометрийге әсер ететін препараттарды қолдана отырып, әртүрлі емдеу сызбалары жүргізіледі:
Циклдік гормондық терапия;
Эстрадиолмен 14-тен 82 күнге дейін үздіксіз ұзақ мерзімді терапия;
Гранулоциттік колонияны стимуляциялаушы факторды (ГКФ) қолдану;
Қосымша терапия ретінде эндометрийдің қанмен қамтамасыз етілу көлемін арттыру мақсатында метаболизмдік және вазоактивті дәрілерді қолдану: силденафил, аспириннің төмен дозалары, курантилді ұзақ уақыт қолдану;
Пайпель-биопсия немесе гистероскопия жүргізу кезінде эндометрий «скретчингі».